Тәуелсіздік құрдасы

Биыл Қазақстан Республикасының тәуелсіздігіне 30 жыл толып отыр. Тәуелсіздігімізбен қатар ашылған Дарынды балаларға арналған үш тілде оқытатын Әл-Фараби атындағы арнаулы гимназиясына да 30 жыл!
Бүгінгі гимназия 1991 жылы еліміз егемендік алған тұста ауыл тұрғындары мен аяулы ұстаздардың табанды еңбектерінің нәтижесінде аудандағы 40 мектептің ішіндегі екінші қазақ мектебі болып ашылған болатын. Мектепке Қарасай аудандық атқару комитетінің 1991 жылғы 15 маусымдағы шешімімен ұлы ғұлама Әбу-Насыр Әл-Фараби есімі берілді. Әлем таныған екінші ұстаздың есімін беруді ғалым, биология ғылымдарының докторы, профессор Әйіп Ысқақов ұсынған болатын.
30 жылдық тарихында гимназия еліміздегі алдыңғы қатарлы білім ордаларының бірі ретінде танылды. Гимназия абыройын өзінің қажыры мен қайратын, өлшеусіз еңбегі мен білімін мектеп мәртебесіне арнаған білікті ұстаздарымыз бен дарынды шәкірттеріміз асқақтатуда. Білім, өнер, спорт салалары бойынша халықаралық, республикалық, облыстық байқаулардың жеңімпаздары саны жылдан жылға еселенуде.
Тәуелсіз ел төрінде ұлы баба есімін иеленген алтын ұя гимназиямыздың жалауы биіктерде желбірей берсін!